Ертегілер әлеміне құштар, ізгілікке сенетін кез келген адам Қуыршақ театрының билеттерін алуға асығады. Мұнда адамның жасына қатысты шектеу жоқ. Театрға келуші әр қойылымнан өзі іздеген жан тыныштығын табады, ерекше көңіл күйге бөленеді! Балалар әлемі ең көңілді, ең шынайы әлем! Ал қоғам осындай тазалыққа құштар!
Жасөспірімдер және ересектер аудиториясына арналған «Шекпен» қойылымы ескі шекпені әлеуметтік мәртебесінің символына айналған Акакий Башмачкин есімді қарапайым шенеуніктің елеусіз өмірін баян етеді. Тігіншінің кеңесінен шабыт алған Акакий жаңа шекпенге тапсырыс беріп әріптестерінің үлкен таңданысын тудырады. Алайда, жаңа шекпен үшін белгісіз адамға тоналып, зардап шеккен оның қуанышы қайғыға ұласып, көңіліне көлеңке түседі. Айналасынан әділеттілік іздеген Акакий, асқан немқұрайлылық пен қатыгездікке тап болады. Терең философиялық астарға ие қойылымда режиссер адам табиғатына тән екіжүзділік, қызғаныш пен қатыгездік сынды қараңғы жақтарды ерекше режиссерлік және сценографиялық шешімдермен, түрлі символдармен көрсетеді. Өмірлік құндылықтар мен әділеттіліктің маңызын дәріптейтін қойылым көрермендерді «адам» болуға үндейді.
Алматы Мемлекеттік қуыршақ театрында тұңғыш рет сахналанған шытырман сюжетке ие әлемге әйгілі «Етік киген мысық» ертегісінде диірменші әкеден қалған мұраға көңілі толмаған еріншек әрі енжар кенже ұлдың ақылды да айлакер мысықтың арқасында қарапайым диірменші баласынан беделі биік маркизге айналуы жолындағы таңғаларлық оқиға баяндалады. Алғыр мысық қожайынын маңғаз мырзаға айналдырып қана қоймай, Патшаның алдында сый-құрметке ие етіп, айдай сұлу Ханшайымға үйлендіріп, тіпті, Кісіжегіш сиқыршыны айламен жеңіп, зәулім сарайға жеткізеді. Еліктірер сюжет пен тартымды атмосфераға ие қойылым сан қырлы кейіпкерлерімен көз тартып, көңілді ойындар, тебірентерлік әндерімен баурап көрермендерге көтеріңкі көңіл-күй мен ұмытылмас әсер сыйлайды.
Аты аңызға айналған біртуар боксшы, халықаралық дәрежедегі спорт шебері, Сидней Олимпиадасының чемпионы – Бекзат Саттархановтың азаматтық болмысы мен асқақ рухын дәріптейтін «Чемпион» қойылымы Алматы Мемлекеттік қуыршақ театры сахнасында тұңғыш рет қуыршақ бейнесінде сыр шертпек. Арманға деген адалдық, мақсатқа жету жолындағы қажырлы еңбек, елі мен жеріне деген сүйіспеншілік көрініс табатын қойылым жас жеткіншектерді қайсарлыққа, өжеттілікке, батылдыққа, шыдамдылыққа тәрбиелейді.
Сонау Антарктиданың мұзды аралында керемет таңғаларлық оқиға орын алды. Күндердің бір күнінде сан мыңдаған жылдар бойы ерімеген мұз еріп, ішінен қашан дүниеге келгені белгісіз кішкентай мамонттың баласы пайда болады. Алпауыт әлемде анасын жоғалтқан кішкентай мамонттың мұхит асып ерлікпен мақсатына жету жолындағы таңғажайып оқиғасы тұңғыш рет қуыршақтар образымен әрленіп ерекше әсерге бөлері анық. Ертегі кішкентай бүлдіршіндерге ғана емес ересектер жан дүниесін де сәуле себер сәттерімен баурап, мейірімділікке, жанашырлыққа, батылдық пен мақсатшылдыққа тәрбиелейді.
